ايمن اسماعيل يكتب شوية اجابات 







شوية إجابات عن أسئلة جاتلي:
- هي الحرب التجارية ممكن تؤثر على صادرات مصر ؟
-- رغم إن الحرب التجارية ممكن تبطئ حركة التجارة العالمية طبعا و الإقتصاد العالمي و تمنع الإستثمارات العابرة للقارات بس مصر نسبة صادراتها للولايات المتحدة مقارنة بنسبة التنين الصيني صغيرة جدا ...فلو الصادرات الصينية قلت أو تأثرت ممكن مصر تنتهز الفرصة و تحاول إن تملأ جزء (صغير نوعا ما) من الفراغ اللي هايتساب و دي هتبقى حاجة كويسة طبعا بس هاتكون عايزة سياسة تنفيذية سريعة و جيدة (جودة منتج و مساعدات للمصدريين إلخ إلخ )
----------
-هي البورصة مؤشر عن إقتصاد الدولة ؟
-- البورصة عادة بوابة للإستثمار الغير مباشر في البلد ...و مديرين الإستثمار ساعات أما يكونوا عايزين يجربوا إستثمار في أي دولة ...بيبدأوا يستثمروا في البورصة بتاعتها كتجربة ...طبعا كل ما رأس مال البورصة المحلية زاد كنسبة من الإنتاج المحلي ...تقدر تأخد البورصة كأحد المؤشرات الإقتصاد ...الإنتاج المحلي لمصر تقريبا ٢٣٥ مليار دولار و رأس المال السوقي البورصة تقريبا بين ٥٥ مليار و ٦٠ مليار دولار ...فالبورصة تقريبا عندنا حوالي ٢٥% من الإنتاج المحلي ...و دي نسبة صغيرة بالنسبة للأسواق المتقدمة بس برده نسبة لا يستهان بها و ممكن نستخدمها كمؤشر طبعا.
----------
- هل الدهب ملاذ آمن ؟
-- في الجو الإقتصادي المتوتر ...أه ...بس طبعا بيعتمد طريقة إستثمارك في الدهب ...عقود و لا شراء السلعة نفسها...و حسب مدة الإستثمار ...في ناس بتاخد الدهب في فترة القلق بس عشان تحافظ على قيمة الإستثمار أو صعودة و بعدين يبيعوا ( ٦-٩ شهور)...و في ناس بتشيلوا على أمد ثلاث سنين و دول يتعرضوا لدورة سعر الدهب (صعود و نزول )
-----------
- هل الإستثمار في البورصة مضاربة أو قمار ؟
-- لو حضرتك مش فاهم في البورصة و داخل تشتري أي سهم كدة و خلاص أو ماشي على السمع بس ...يبقى وفر فلوسك و بلاش تدخل فيها ....لو حضرتك فاهم أو شغال مع حد فاهم أو خد بيدير محفظتك يبقى لأ زيها زي أي مشروع لسه دراسة جدوى و بتدخل فيه و بتطلع منه .
----------
- أنا طالب في كلية إقتصاد و علوم سياسية ...و شايف الإقتصاد العالمي مهزوز و الدنيا خربانة ...هو أنا كدة هاطلع مش هلاقي شغل؟
-- الدنيا مش خربانة ..ما تقلقش...و عادي زي ما أنت عارف ...الإقتصاد دورات ..صعود و نزول ...إحنا سوقنا أزمة في ٢٠٠٠ و ٢٠٠٨ و عادي ..العالم بيكمل ...بالعكس إن ممكن أما تكون متخرج تكون واخد الإقتصاد عند دورة الصعود ...و في الآخر ...الرزق ده على ربنا ...إجتهد أنت بس.
-----------
- هو أنت لو هاتتكلم عن الفريندزون friend zone بطريقة إقتصادية هاتقول إيه 😄؟
-- هاقول إن الفريندزون هو عقد "صداقة" لمدة غير محددة يتيح لأحد الأطراف حق على الطرف الآخر بالتمتع بمزايا معينة من مزايا العلاقات العاطفية بدون الدخول رسميا في علاقة عاطفية و إذا حاول الطرف الثاني التلميح بأي مشاعر للطرف الأول يصبح العقد لاغي أو سيكون علي الطرف الثاني تعويض الطرف الأول بوجبة بيج ماك الأضرار النفسية المترتبة على "الضغط النفسي الناتج من محاولة الدخول في علاقة عاطفية " 😄
شكرا